ប្រធានព្រឹទ្ធសភាបានត្រឡប់មកកាន់មាតុប្រទេសវិញបន្ទាប់ពីទស្សនកិច្ចជាផ្លូវការនៅវៀតណាមរយៈពេល ៣ថ្ងៃ
ភ្នំពេញ៖ ប្រធានព្រឹទ្ធសភា សម្ដេចសេនាភក្តី សាយ ឈុំ បានធ្វើមាតុភូមិនិវត្តន៍មកកាន់មាតុប្រទេសវិញនៅរសៀលថ្ងៃនេះ បន្ទាប់ពីទស្សនកិច្ចជាផ្លូវការនៅប្រទេសវៀតណាម គិតចាប់ពីថ្ងៃទី២៤ ដល់ថ្ងៃទី២៦ ខែតុលា ឆ្នាំ២០២២។
គួរឱ្យដឹងថា នៅរសៀលម៉ោង ១២:០០នាទីនេះ គណៈប្រតិភូជាន់ខ្ពស់ព្រឹទ្ធសភានៃព្រះរាជាណាចក្រកម្ពុជា ដឹកនាំដោយ ប្រធានព្រឹទ្ធសភា សម្ដេចសេនាភក្ដី សាយ ឈុំ បានអញ្ជើញធ្វើមាតុភូមិនិវត្តន៍មកកាន់មាតុប្រទេសវិញ ដោយសុវត្ថិភាព បន្ទាប់ពីចុះទៅបំពេញទស្សនកិច្ចជាផ្លូវការ នៅសាធារណរដ្ឋសង្គមនិយមវៀតណាម ពីថ្ងៃទី២៤ ដល់ថ្ងៃទី២៦ ខែតុលា ឆ្នាំ២០២២។
គួរបញ្ជាក់ថា ដំណើរទស្សនកិច្ចជាផ្លូវការនេះ គឺជាការពង្រឹងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរ និងរវាងព្រឹទ្ធសភាកម្ពុជា ជាមួយនឹងរដ្ឋសភាវៀតណាម ឲ្យកាន់តែមានការរីកចម្រើន ដើម្បីជាគុណប្រយោជន៍សម្រាប់ប្រជាជន និងប្រទេសទាំងពីរទាំងក្នុងពេលបច្ចុប្បន្ន និងអនាគត៕